السعادة,,,وخبز البلوبيري الطازج

في كتير اشياء بتشعرنا بالسعادة,,مش بالضرورة تكون اشياء فخمة,,, اشياء بسيطة ومتواضعة وما بدها تعب ولا مصاري ولا اي نوع من انواع النفاق ,,,بس اكتر اشي بيشعر الانسان بالسعادة والانجاز هو انو يشعر غيرو بهاد الاشي,,احسن دوا للإكتآب (اللي هلأ صار موضة لأي حدا بعاني من اعراض حزن روتينية وخفيفة ومتوقعة بما انو الحياة مرات صعبة,,,صار الكل بيحكي انا بعاني من الاكتآب) احسن دوا الو هو ادخال السرور على قلوب الناس والمساعده والمشاركة باعمال تطوعية ممكن تكون بسيطة كتير كتيييير متل انك توقفي سيارتك وانتي ماشية  وبقمة عُجالتك وتشيلي زبالة او كرتونة من الطريق لانو اماطة الاذى عن الطريق صدقة,,

من الاشياء اللي بتشعرني بالسعادة,,,احم احم يمكن اطول شوي والليستة تطول وتطول وتطول بس هي اشياء عنجد هبلة وبسيطة,,,عشان هيك  سميت مدونتي بهاد الاسم لأنو عنجد السعادة في اشياء بسيطة جداً ,,المهم انو نشوف وننتبه ونقدر

بلال,,,صاحب محل جاج جنب بيتي,,كتير انسان محترم, نظايفي,,بس محلو كان كتير قديم (مع انو قدم المحل ما كان مأثر عالنظافة اطلاقاً,,حتى كان في محلو  لمسة انثوية,,كنت كل ما اروح عالمحل اجيب جاج اتطلع بلوحة معلقة عندو مطرزة تطريز فلاحي عليها خريطة فلسطين واسم بلال,,,ما بعرف ليش بس كنت متأكدة انو أمو هي اللي عملتلو ياها اول ما فتح المحل,,,كنت اتخيل شكلها وهي قاعدة جنب الصوبة بالشتا وهي بتطرز بكل حب لأبنها وتقلو : يما يا بلال روح الله يرضى عليك,,خيالي واسع شوي بعرف!) يا خوفي تكون اجتو هدية,, بس بغض النظر كان في كتير حب في هاي اللوحة,,,كيف مافيها حب وفيها خريطة فلسطين؟!! المهم ,,,بلال فتح محل جديد جديد ونظيف كمان,,كتير كتير انبسطت وفرحت وباركتلو من كل قلبي وعشان الكزب حرام جزئ من سعادتي كان انو المحل عا نفس سايد بيتي ,,يعني من اليوم وطالع سلطان هو اللي رح يجيب الجاج بما انو المحل القديم كان عالسايد التاني وكنت اخاف اخليه يقطع الشارع  
جهزت لبلال صحن تقديم وعبيناه ملبس ولفيتو بورق شفاف وشبر ملون وبعتنالو ياه مباركة للمحل الجديد,,,اشي اهبل بس حسيت بالسعادة

الكتب اشي تاني بيشعرني بالسعادة,,,وهاد موضوع بدو بوست خاص بس عشان احكي عن الكتب وقراءة الكتب ونادي القراءة اللي عاملتو عندي بالمدرسة

الورد,,,بجميع اشكاله وانواعة,,الاكل,,,الشوكولاه,,,شغلي,,,بناتي,,,مطبخي,,,اهلي واحبابي,,,كلها اشياء بتشعرني بالسعادة,,,بس الاهم من هيك هو انو السعادة بتكون من جواتنا ,,احنا بنختار نشوفها ونحسها ,,,الاشياء ممكن تروح بس السعادة بتضل

اشي تاني خلاني اشعر بسعادة مطلقة قبل اكم يوم هو خبز( او بالاحرى كيك) البلوبيري مع الليمون,,يا الله شوكان زاكي 

حامض,,,وهش ,,,,وجنبو شاي ,,,وملون,,,,وسهل (ما طلت الخلاط من الخزانة) وهيك ما بعرف حسسني انو الدنيا ربيع والجو بديع

قلتلكم انو الاشياء اللي بتشعرني بالسعادة اشياء بسيطة وهبلة ( ومعظمها تدور حول الاكل ) ههههه مين ما بحب الاكل والنوم يرفع إيدو

طريقة الخبز 

كاسة ونص طحين +ملعقة كبيرة 

2 ملعقة ص بايكنج باودر

نص ملعقة ص ملح

1 كوب لبن رايب

1 كوب سكر

3 بيض حجم كبير

2 ملعقة ص برش ليمون 

نص ملعقة ص فانيللا

نص كوب زيت نباتي

كوب ونص بلوبيري طازج او مجمد,,,انا استخدمت طازج وكان تقريباً كوب واحد من كارفور العلبة ب 4 دنانير

سيرب الليمون 

ثلث كوب عصير ليمون طازج

ثلث كوب سكر

يوضع عالنار ويحرك حتى يغلي لعدة دقائق

ايسينج الليمون

1 كوب سكر بودرة

4\3 ملعقة كبيرة عصير ليمون

يحرك مع بعض لحين امتزاج السكر 

تخلط المواد الجافة اولا مع بعض

ثم يضاف عليها المواد السائلة بالتدريج وعلى دفعات

يضاف ملعقة طحين على البلوبيري ويحرك حتا كل حبات البلوبيري تتغطى بالطحين,,,هاد الاشي بيخلي البلوبيري ( او اي اشي صلب داخل الكيك) ما يرسو للقاع وبالتالي ما يتجمع وينحرق بقاع الصينيه

يوضع الخليط في صينية خبز مستطيلة  تاعتي ما لقيتها فا اطريت احط الخليط بصينية كيك عادية 

 تخبز في فرن 180 درجة  لمدة 55 او 60 دقيقة

بعد ما تخرج من الفرن وتبرد لمدة 10 دقائق بنقوم بغرز شوكة بالكيك من عدة اماكن وبنشربها بقطر عصير الليمون

لما تبرد تماماً بندهنها بآيسنج السكر والليمون

اشي خرافي وزاكي ومنعش للصيف 

هواكيد مثالي مع الشاي بس عصير الليمون مع النعنع كان الخيار التاني بهاد الجو ,,غشيت واستعملت تانج