كيف اجعل اولادي يحبون القراءة؟ Helping my kids love reading

السلام عليكم ورحمة الله وبركاته,,,بشكر كل اللي سألو عني واللي متابعين مدونتي  انا كتير مبسوطة انو في ناس متابعة الخواطر اللي عم اكتبها هون ومتفاعلة يا برسالة او تعليق,,من كل قلبي بشكركم

غيابي طبعاً كان خجلاً واستحياءً من غزة,,,كيف اكتب عن امور دنيوية عادية وانا عم اشوف اللي عم يصير كل يوم,,,صابتني حالة كآبة والحمد لله اجا العيد وربنا انزل سكينته على المسلمين,,الله يرفع الشدة عن كل مسلم وكل مظلوم في هالدنيا مين ما كان

من زمان بدي اكتب عن الكتب,,,وعن تجربتي المتواضعة مع اولادي في جعلهم يحبو القراءة او على الاقل خلينا نقول جعلهم يحترمو الكتاب ويتقبلو انهم يمضو بعض الوقت في قراءة قصة او تصفح كتاب علمي

في بيتي ما في تلفزيون,,,قرار اجا صدفة على فكرة يعني عشان ما تفكرو انو احنا العائلة المثالية اللي كلها مثقفين وفلاطح ههههه وهي بيتي الحمدلله خالي من هالحرامي للشهر السابع على التوالي,,الجميل في الموضوع انو اولادي اطلاقاً ما مانعو ولا غلبوني ولا حتى طلبو انو نرجعو,,,المؤسف في نفس الوقت هو انو هاد مو قرار نهائي وللأسف رح نرجعو عن قريب 

كيف علمت اولادي حب القراءة؟؟

ببساطة لما شافو انو الاهتمام بالكتاب كان من اهم الاولويات في البيت عرفو انو القراءة الها مكانة مميزة ووجود الكتب من الطفولة المبكرة والتشديد على المحافظة عليها كان الو أثر كبير

بتزكر اول مجموعة كتب اشتريتهم لسلطان كانت من السيفوي من كشك ارامكس وكان عامل عليهم عرض مرتب,,ما قدرت اقاوم مع انو سلطان كان لسا مش مولود,,,وطبعاً ما كانت هاي اخر مرة

نصيحتي للأمهات المهتمين بزرع حب القراءة عند طفلها 

اولاً,,,,الوقت مش متاخر ابداً,,,بلشي من هلأ,,مش ضروري يكونو اطفال رضع( مع انو

 انا بتجربتي حسيت انو كان الو اثر كبير,,وتعودو يشوفو القصص حوليهم وما يخربوها) مهما كان الطفل صغير او كبير فسحر القصص ما الو عمر ,,كلنا بنحب القصص مو؟

 ثانياً....من الضروري جداً انو الطفل يحس بأهمية الكتاب وهاد الشي بييجي من مراقبتو لأهلو,,ازا كانو الاهل مهتمين في هاد الموضوع بينعكس عالطفل,,رؤية الطفل لامه او ابوه ماسكين كتاب او حتى جريدة وبيمضو ولو بضع دقائاق في القراءة بيخليهم يحسو انو هاد الشي من نشاطات البيت المعتادة,,ما بنسى دائماً صورة بابا في مخيلتي وهو بيقرأ طول الوقت وكمان ماما لحد الان بتمضي اكتر وقت فراغها بقراءة الكتب عن سيرة الرسول صلى الله عليه وسلم وغيرو من الكتب وطبعاً رفيقتها الدائمة الجريدة اليومية

ثالثاً,,,,القراءة للطفل,,خاصة قصة ما قبل النوم ,,بحس الها وقع على نفوسهم ودائماً  بيطلبو مني اقرألهم حتى سلطان مع انو كبير بس بيحب قصة ما قبل ما قبل النوم

الحمد لله وصلنا معو لمرحلة انو مرات بس اصحا بلاقي صاحي قبلي وبيقرأ كتاب,,والشطارة مش في ابني الشطارة في انتقاء الكتاب الجذاب

رابعاً ,,,لا تبخلو بالكتب الجيدة عا اطفالكم واعني بالكتب الجيدة الكتب الجذابة اللي الها رونق خاص,,الصور تكون واضحة والمضمون يكون ممتع,,وبحب أنوه لشغلة ضرورية انو الاهل لازم يتصفحو الكتاب قبل شراؤه,,مع انو كتب الاطفال آمنة لكن في بعض الكتب تتضمن اشياء ممكن يعارض سياسات بعض الاهل في التربية ,,قبل فترة اشتريت لسلطان اطلس رائع من ناشونال جيوغرافك بما انو ابني مهووس في هالقناة,,بنصح الكل يقتنيه بسيط وممتع واسلوب الطرح سلس,,انتبهت انو عا خارطة آسيا وتحديداً الشرق الاوسط كانت فلسطين ممحية تماماً ومكتوب بدالها اسرائيل,,طبعاً انا الف عفريت اتنططو قدامي بهديك اللحظه وكان لازم افهم ابني الموضوع,,قعدنا مع بعض وكتبنا  ايميل للموقع ,,بعرف انو ما بيقدم ولا بيأخر واغلب الخرائط العالمية عليها نفس الشي بس كان لازم اعمل اشي

وخامساً,,,,حبو الكتاب وصدقوني ولادكم رح يحسو بهاد الحب,,اهدوا اطفالكم كتاب مع كل لعبة بتشتروها  و اكتبو اهداء لأطفالكم  مع التاريخ,, شجعوهم يهدو كتب لأصدقائهم وابنو الهم مكتبة صغيرة او حتى رف واحد ,,شجعوهم ايضاً على التبرع بالقصص والكتب (مع انو بالنسبة الي هاد اشي كتير صعب,,بس ( لن تنالو البر حتى تنفقو مما تحبون) وانا بحب الكتب)  وبحب شراء الجديد منها

شكر كتير كبير لمدرستهم وللمعلمات اللي الهم دورمهم في تشجيع ولادي على القراءة,,,كونو حريصين عا اهتمام المدرسة بهالشي وازا ما في مكتبة بالصف شو رأيكم تتبرعو بالكتب او تعملو مبادرة مع امهات تانيين وتعملو رف صغير للصف مع شوية قصص؟؟

اعتقد انو عقول اولادنا امانة متلها متل اجسادهم وارواحهم واحنا كأهل خاصة الامهات مسؤلين عن تنمية هذه العقول وزرع كل مفيد فيها,,,مهمتنا كتير سهلة صدقوني بزمن موجود في كل الكتب الرائعة ,,منها الناطق والتفاعلي واللي بيتضمن العاب وأصوات واشي مع نضارات ثري دي واشي بيحكي وبيطبخ,,المهم يكون في اهتمام من الاهل

دمتم ودامت امتي امة إقرأ