جدي محمد جباي رحمة الله عليه

من اقدم الاشياء في بيت اهلي صورتين لوثيقتين معلقين في غرفة الضيوف,,الوثيقتين عمرهم 77 سنة!! كل ما اتطلع عليهم بحس التاريخ كلو واقف قدامي,,والمفارقة اللطيفة هي انو بين الوثيقتين الي وحدة مكتوبة بالعربي والتانية بالانجليزي ,,بينهم معلقة ساعة,,ما بعرف ازا الموضوع ديكور ولا مقصود او هيك صدفة (نسيت بصراحة مين معلقهم يمكن بابا) ,,وكأن الساعة بتحكيلك من 77 سنة وانا ما وقفت,,وحتى لو الزمن للحظة معينة بين كأنو دهر كامل بس عقرب الثواني ما وقف والساعة والوقت والدهر مستمرين,,

الوثيقتين بيعودو لجدي الله يرحمو ,,لما كان بالجيش وبالتحديد في امارة شرق الاردن,,,يااه شو زمان!! ويمكن ما عرفت جدي منيح لانو لما توفى كنت انا صغيرة كتير وفي مخيلتي طيف من صورتو ومن شكلو,,بس كل ما اسمع الناس بتمدح فيه وبخصاله الحميدة بشعر بالفخر والاعتزاز 

قديش في ببيوتنا زوايا بتحمل تاريخ عائلة كاملة؟!! وقديش صورة صغيرة متل هاي بتختصر حياة انسان عاش عمر وبتفاصيل بسيطة متل هيك لساتو ما مات 
شهادتي اكيد مجروحة بجدي بس لازم افتخر انو كان رجل عظيم ,,كريم ومعطاء وعمرو ما خيب حدا,,بطل في زمن كان كتير صعب ,,فارس وخيال ولاعب بولو من الدرجة الاولى,,

الله يرحمو ويرحم جميع اموات المسلمين