مربى القرع

واخيراً دبحنا هالقرعة !! كان يوم حافل 

بنت خالتي (شهيرة) مو طبيعية !! من اكثر النساء المنتجات اللي عرفتهم,,وبصراحة بستحي من هيك ناس,,بنت خالتي بتزرع قرع,, وبتخبز (مو بحكيلكم الخبز شرط للنجاة في عيلة ماما,,,ما بياخدو الايزو ازا ما خبزوا ,,الله يعطيهم الصحة والعافية يا رب ) بتعمل جبن بالبيت ولبن وبتربي جاج عشان البيض البلدي,,يعني كلو صحي واورجانك !! لازم ياخدوكي عا اوروبا يا بنت خالتي . وكل هاد وهي عمرها فوق الستين سنة اتوقع ازا انا مو غلطانة!! الله يباركلك في صحتك يا شهيرة ويقويكي يا رب

القرعة من عندها,,ولما احكي قرع ما تتوقعو هو نفسو اللي بتشوفو بالمحلات,,,يعني هو شوي اكبر,,بالواقع هو كتييير اكبر

كنت من زمان حابة اعمل مربى من القرع ,,والشيشان بيعملو بطريقة مختلفة ,,لانو عادة بيشربو الشاي بدون سكر ولازم يكون جنب  الشاي اشي زاكي متل العسل الطبيعي او المربى و هاد المربى مثالي مع الشاي

الطريقة سهلة كتير بس بدها شوية وقت ,,,, حبيت اصور الخطوات لأنو عن جد كنت مستمتعة وانا بشتغل

اول شي لازم القرع يكون بلدي,,يمكن العادي او المستورد بيزبط بس ما يعطي نفس النتيجة

بعدين بتحتاجو كلس من عند مواد البناء,,,اه قرأتو مزبوط,,,كلس!! او في ناس بيسمو (شيد) ازا بتسألو مواد البنا بيعرفو,,بيستخدمو كمان للزيتون.  بننقع الكلس في ماء عادي ويتم تحريكه جيداً ,,بنتركه  يترسب وبناخد الموي اللي تصفت عالوجه ببطئ شديد حتى ما ناخد من الكلس اللي تحت

الكلس بيعمل على قساوة قطع القرع ولما نغليها بالقطر بتضل محافظه على شكلها

قشرت وقطعت القرع,,,واول ما قطعتها  طلعت ريحتها ,,يا الله شو الريحة كانت قوية ومنعشة,,فريشعالاخر

ومن جوا رح تشوفو الالياف تاعتها ,,,اشي صحي بتمييز

الولاد كتير انبسطو وهمه بيساعدوني وحاولت قد ما بقدر احول الموضوع لتجربة تعليميه ودينية (معلمة شو بدي اعمل !!) فرجيتهم الالياف اللي جوا وخليتهم يساعدوني بأيديهم ويجمعو البذور عشان نزرعها بالمزرعة

عملت شوربة وخبيت شوي عشان اعمل فطاير بحكيلكم عنهم بعدين

يقطع لمربعات صغيرة

وينقع في موية الكلس ليلة كاملة

تاني يوم بنغسلو منيح منيح

يرش ملئ ملعقة ملح ليمون وبنحركو منيح ويغسل مرة اخرى

متل كل انواع المربى العيار هو كيلو سكر لكل كيلو بدنا نعملو

بنعمل من السكر قطر (كاسة موي لكل كاستين سكر ,,يغلى جيداً عالنار) وبعدين بنسقط القرع بالقطر وبنتركو عالنار يغلي لعدة  ساعات

لميت كل المرتبانات اللي في الحياة وعقمتهم بالفرن

mason jarsهدول نوع مرتبانات كنت من زمان بدور عليهم اسمهم

المميز فيهم انو الغطا تاعهم بيفتح غير شكل,,كتير في افكار بتقدرو تعملوهم منهم

ممكن ينحط عليه كبش قرنفل

 انا حطيت عود فانيللا  

وزينتو

وصورتو 

ووزعتو للأحباب

وعملت بطاقات عشان اهديهم مع المربى

بس اكتر صورة بتضحك هي صورة العجقة اللي بعملها بس اصور اشي,,,لا تعلقو عا مفتاح جرة الغاز,,,هاد من لوازم التصوير 

اه,,,كدت ان انسى الشاي 

شاي شيشاني :)

وصحتين